FAKATAPU ki he 'Otua 'oku 'afio 'i hotau lotolotongá. Tapu mo e 'Eiki Sea 'o e Fale Alea, tapu mo e 'Eiki Palēmia, Hou’eiki Minisita ‘o e Kapineti, tapu mo e Hou’eiki Nōpelé pea tapu mo e kau Fakafofonga ‘o e Kakaí.

‘Eiki Sea, 'oku ou tuku 'a e fakamālō ki he 'Otua mafimafi 'i he'ene tataki mai 'a e FAle Alea ki he fakataha 'o e 'aho ni.

Kuo kakato 'a e taumu'a na'e kotofa ki ai e fakataha makehe ko 'ení 'i he funga 'o e fiema'u ko ia 'e he Fale Alea ke fakapapau'i 'oku alea'i lelei pea ke paasi 'a e ngaahi lao 'i he taimi fe'unga koe’uhí ko e lelei fakalukufua 'o e fonua.

'Oku hā mei he vave 'a hono alea'i mo e fakapaasi 'a e ngaahi lao ko ení 'a e fiema'u 'e he Falé 'a e laumālie 'o e ngāue fakataha 'a e Hou'eiki Memipa 'o e Fale Aleá koe'uhí ko e lelei fakakātoa 'a e kakai 'o e fonuá.

Hili 'a e liliu fakapolitikale na'e fakahoko ‘i he ta'u 'e ua kuohili angé ‘e kei fiema'u pē ha taimi pea toki hā mai 'a e fua 'o e Temokalaté. Ko ia 'oku 'oatu 'a e poupou ki he 'Eiki Seá ke hoko atu e ngāue 'o fakatatau pē ki he Lao he 'oku tuku mai 'a e 'amanaki 'a e kakai 'o e fonuá ki he Falé ni ki ha fakalakalaka faka'ekonomika mo fakasosiale.

'Eiki Sea 'oku lelei 'a hono tali 'a e Lao ki he Fokotu'utu'u ki he Sipoti 'o e Pasifiki 2013 koe'uhí 'oku 'i ai e 'amanaki 'e hoko 'a e teuteu ki he sipotí ko ha me'a ke faka'ai'ai'aki ‘a e kakaí ke nau fakamālohisino pea nau ma'u ha tu'unga mo'ui 'oku lelei ange.

‘Oku fakatokanga’i ‘a e fokotu’u ko ia ke liliu ‘a e Konisitūtone´ ‘o fakatautefito ki he kupu felāve’i mo e pāloti fakamālōlō’i ‘o e Palēmia´ mo hono Pule’anga´ ko hono sivi’i ‘eni ‘o e Temokalate fo’ou pea hangē pē ko ha koloa mahu’inga ‘oku fo’ou kuo pau ke kei fiema’u ke fakalelei’i kā ‘i he founga ‘oku loto ‘aufuatō, poto mo fakapotopoto mo e vakai lōlōa atu ki he kaha’u´.

‘Oku ‘i ai ‘a e ‘amanaki ‘e ngāue ‘a e Fale ni ki he kaveinga ko ‘eni´ ‘i he founga ‘oku taau mo totonu pea ‘i hono mahino’i foki ha ola te ne uesia ‘a e fakahoko ‘e he Pule’anga´ hono fatongia ki he kakai´.

‘Eiki Sea ‘oku kei pelepelengesi ‘a e tu’unga faka’ekonōmika ‘o māmaní pea na’e kei ‘i ai pē mo e faingata’a ke fakakake hake ‘etau tu’unga faka’ekonōmiká talu mei he kamata ‘a e tō ‘a e tu’unga faka’ekonōmika fakamāmāni lahí. Kā neongo ia ‘oku ‘i ai pē ha ngaahi faka’ilonga ‘oku ‘i ai ‘a e fakalaka ‘i he tu’unga pa’anga hū maí ‘o tupu pē mei he kake ‘i he fakahū pa’anga mei muli´ pea pehē ki he ngāue Takimamata´.

‘Eiki Sea ‘oku ‘i ai ‘a e ‘amanaki ‘e tupu hano fakahoko ‘a e ngaahi fakalelei ki he ngaahi va’a ‘o hangē ko e fakalele ‘o e pisinisí ko ha founga tukuhau ‘oku fe’unga, ko e ma’u’anga ivi ‘oku tolonga mo tu’uloa, ke lelei ange ‘a e fakahoko fatongia ‘a e kau ngāue faka-Pule’anga´, ko e ngaahi ngāue langa lalahi´, fefononga’aki´ pea mo e ngāue faka-pangikē ke to e langa hake ai ‘a e tu’unga ‘o e ma’u’anga mo’ui neongo ‘oku fakangatangata pē ‘a e ma’u’anga koloá.

‘Eiki Sea ‘oku ‘oatu ‘a e fakamālō lahi ki he ngāue kotoa kuo lava ‘i he fakataha makehe ko 'eni ‘o e Fale Aleá, tokoni mai ‘Eiki.

TUPOU VI

HSH Prince Tungi
HSH Prince Tu’ipelehake
Nōpele Luani

Share

Daily Progress in the House

Bills Before Select Committees

Papers & Petitions Presented

Go to top